അതും കൈയില്‍ പിടിച്ചങ്ങനെ നിന്നപ്പോള്‍ മഴച്ചാറ്റല്‍ ജനലിലൂടെ അകത്തേക്ക് വീശി, നനുത്ത കാറ്റ് !! മേശമേല്‍ വച്ചിരുന്ന പത്രക്കടലാസുകള്‍ കാറ്റില്‍ പാറി നിലത്തു വീണു. ഓര്‍മ്മകള്‍, മഴപ്പാറല്‍ പോലെ മനസിലേക്ക് ....
"തറവാട്ടുമുറ്റത്തു മുളച്ച തകരതണ്ടുകളില്‍ തട്ടി തിരിഞ്ഞൊഴുകുന്ന കടലാസുതോണി... അതിനെ നീര്‍ ചാലിലേക്ക് തള്ളിവിടുന്ന അനിയത്തിയുടെ കരിവളയിട്ട കൈകള്‍ ..."
മുറ്റത്ത് കെട്ടികിടക്കുന്ന വെള്ളം കലപില കൂട്ടി .ആ , അപ്പു വന്നോ? അവനാകെ നനഞ്ഞിരിക്കുന്നു.കണ്ണടചില്ലില്‍പറ്റിയ വെള്ളം തുടച്ചുകൊണ്ട് അപ്പു ബാഗ് മേശക്കു മുകളിലേക്കെറിഞ്ഞു.അതവിടെ എത്തും മുന്‍പ് അവന്‍ പടി കയറിപ്പോയി .
"കളിതോണി ഉണ്ടാക്കുന്നത് എങ്ങനെ ആണെന്ന് അവനറിയുമോ എന്തോ?എന്തായാലും പട്ടവും വിമാനവും ഉണ്ടാക്കുന്നതുകൂടെ കാണിച്ചു കൊടുക്കാം. എനിക്കെപ്പോഴും ഇതൊക്കെ ഉണ്ടാക്കി കൊടുക്കാന്‍ പറ്റില്ലല്ലോ ."
"എന്തൊരു നശിച്ച മഴ ! അല്ലെ, ഗ്രാന്‍പാ?" ഞാന്‍ അവനെ നോക്കി , "നശിച്ച മഴ!!!?" അവന്‍ ജനലുകളടച്ചു. മഴകാഴ്ച മറഞ്ഞു, മഴനൂലുകള്‍ക്കിടയിലൂടെ പണിപ്പെട്ട് അകത്തുവന്ന വെളിച്ചം പിന്തിരിഞ്ഞു.ബള്‍ബുകള്‍ തെളിയുന്നു, കണ്ണ് മഞ്ഞളിക്കുന്നു..
അവന്‍റെ കമ്പ്യൂട്ടര്‍ സ്ക്രീനില്‍ തെളിഞ്ഞു "WELCOME" ,"സ്വാഗതം? , വിരസമായ പതിവ് സായാഹ്നത്തിന് ?" ആ തോണി ചവറ്റു കുട്ടയിലേക്ക് ... "അത് വെള്ളം കിട്ടാതെ മരിക്കട്ടെ.ഇങ്ങനെ ഒരുപാട് തോണികള്‍ ഓരോയിടത്തും മരിക്കുന്നു, അക്കൂട്ടത്തിലേക്ക് ഇതും."
